HITTUMST.
KÖSTUM.
KEPPUM.

Pílusalur Völsungs í sundlaugarkjallaranum á Húsavík er opinn flesta daga. Forsvarsmenn Píludeildar Völsungs eru duglegir að birta upplýsingar um opnunartíma á Facebook-síðu deildarinnar.

Félagsgjöld deildarinnar eru:

• 14–18 ára: 15.000 kr.
• 18 ára og eldri: frá 15.000 kr.
• Stakt kvöld: 2.000 kr.

Félagsmenn deildarinnar sem eru í Framsýn og Þingiðn geta nýtt íþrótta- og heilsueflingarstyrki félaganna upp í æfingagjöldin og fengið þannig allt að 50% niðurgreiðslu. Styrkurinn til félagsmanna fer eftir greiddu félagsgjaldi.

Píludeild Völsungs er ánægð með samstarfið við Framsýn og Þingiðn og hefur komið þakklæti sínu á framfæri við félögin.

Stéttarfélögin hvetja alla áhugasama til að mæta í sundlaugarkjallarann á Húsavík og prófa þessa mögnuðu íþrótt. Það á ekki síst við um félagsmenn sem geta nýtt styrki stéttarfélaganna til að taka þátt í pílustarfinu.

Félagsmenn geta keypt pílur, fylgihluti og annan varning í búð deildarinnar, sem er staðsett í félagsaðstöðunni.

Nýjar vörur eru væntanlegar og því tilvalið að kíkja við næst þegar mætt er á æfingu!

Félagsfundur Píludeildar Völsungs var haldinn í Vallarhúsinu á Húsavík miðvikudaginn 7. október 2026. Jónas Halldór Friðriksson, formaður deildarinnar, var fundarstjóri. Farið var yfir starf liðins vetrar, fyrirhugað mótahald og skipulag starfsins fram undan.

Á starfsvetrinum 2025–2026 greiddu 57 einstaklingar félagsgjald, 33 tóku þátt í deildarkeppninni og 12 kepptu á mótum á vegum Íslenska pílukastsambandsins. Fyrirtæki og félagasamtök nýttu einnig hópatíma í pílusalnum og reglulegt starf var hjá Lávörðum og í kvennakasti. Öll píluspjöld í aðstöðunni voru endurnýjuð á tímabilinu.

Framsýnarmótaröðin er fyrirhuguð sem stór þáttur í starfi vetrarins 2026–2027. Í drögum að mótadagatali er gert ráð fyrir sex umferðum frá október til maí, þeirri fyrstu 16. október. Einnig voru kynnt áform um jólamót, páskamót og Mærudagsmót.

Þá var rædd hugmynd að opnu Húsavíkurmóti í pílu laugardaginn 10. apríl 2027 í tengslum við 100 ára afmæli Völsungs. Hugmyndin ber vinnuheitið „Heimamenn Open – 100 ára afmælismót“ og kallar á frekari undirbúning.

Félagsgjöld og verkaskipting stjórnar og nefnda voru meðal dagskrárliða. Stjórn deildarinnar skipa Jónas Halldór Friðriksson formaður, Guðmundur Þráinn Kristjánsson gjaldkeri, Sævar Örn Guðmundsson ritari, Davíð Jónsson sem fer með viðhaldsmál og meðstjórnendurnir Þröstur Þór Sigurðsson, Þórunn Anna Magnúsdóttir og Snorri Gunnlaugsson.

Hreiðar Þór Jósteinsson er formaður húsnefndar. Með honum starfa Brynjúlfur Sigurðsson, Gunnar Jóhannsson, Sigmundur Arnar Jósteinsson og Guðmundur Þráinn Kristjánsson. Nefndin heldur utan um þrif og opnanir aðstöðunnar.

Mótanefnd skipa Sævar Örn Guðmundsson, Jónas Halldór Friðriksson, Snorri Gunnlaugsson og Sigmundur Arnar Jósteinsson. Guðmundur Þráinn Kristjánsson er jafnframt upplýsinga- og fréttafulltrúi deildarinnar.

Á fundinum var lögð áhersla á að félagsmenn gætu lagt sitt af mörkum eftir getu, bæði við umsjón aðstöðunnar og framkvæmd móta.

Þórunn Anna Magnúsdóttir fór ósigruð í gegnum kvennariðilinn á fyrsta kvöldi Framsýnarmótaraðarinnar hjá Píludeild Völsungs. Hún vann alla þrjá leiki sína og alla níu leggina — glæsilegur árangur!

Helga Björg Pálmadóttir varð önnur með tvo sigra og sex unna leggi. Kristjana E. Gunnarsdóttir varð þriðja með einn sigur og Sædís Sævarsdóttir fjórða.

Þórunn Anna var einnig með hæsta þriggja píla meðalskor riðilsins, 36,56, en Helga Björg fylgdi á eftir með 35,31.

Til hamingju með árangurinn og takk fyrir kvöldið, allar fjórar! 💚🎯

Skráning í Píludeild Völsungs er í fullum gangi og við hvetjum bæði núverandi félaga og nýja iðkendur til að skrá sig í félagið.

Hvort sem þú ert að stíga þín fyrstu skref í pílukasti eða hefur spilað lengi, þá ertu velkomin í hópinn. Pílukast er skemmtileg íþrótt þar sem einbeiting, nákvæmni og góður félagsskapur fara saman.

Með skráningu styður þú við starf deildarinnar og hjálpar okkur að efla pílukast á Húsavík.

Vertu með í skemmtilegum félagsskap hjá Píludeild Völsungs!

Þá er komið að því! Fyrsta umferð í Framsýnarmótaröð Píludeildar Völsungs fer fram föstudaginn 16. október 2026 í pílusal deildarinnar.

Húsið opnar kl. 18:30 og mótið hefst kl. 19:30.

Skráningu lýkur á miðnætti fimmtudaginn 15. október. Skráningarhlekk er að finna við mótatilkynninguna á Facebook hjá deildinni.

Sama fyrirkomulag verður á deildinni og undanfarin ár. Allir geta verið með og raðað er í deildir eftir styrkleika. Keppt er í 501, með einföldum inn og tvöföldum út. Fjögur bestu kvöldin telja af sex.

Umferðir vetrarins eru 16. október, 27. nóvember og 11. desember 2026, og 22. janúar, 12. febrúar og 7. maí 2027.

Þátttökugjald er 8.000 kr. fyrir öll kvöldin eða 2.000 kr. fyrir stakt kvöld. Hægt er að greiða á staðnum eða með millifærslu.

Öll velkomin — sjáumst í pílusalnum!

Páskamót Píludeildar Völsungs fór fram í apríl 2026 við mikla stemningu og fjölmarga spennandi leiki.

Snorri og Þröstur stóðu uppi sem sigurvegarar

Í úrslitakeppninni mættust Billi og Jón Helgi annars vegar Sigga og Gesti, en Snorri og Þröstur mættu Gumma Lilla og Sævari. Billi og Jón Helgi unnu sinn leik og Snorri og Þröstur sigruðu einnig, þannig að þessi tvö lið mættust í úrslitaleiknum.

Úrslitaleikurinn var æsispennandi og hart barist. Að lokum stóðu Snorri og Þröstur uppi sem sigurvegarar páskamótsins.

Helga og Sædís unnu B-úrslitin

Í B-úrslitum mættust Helga og Sædís annars vegar og Þórunn og Fannar hins vegar. Þar fór fram spennandi leikur sem endaði með sigri Helgu og Sædísar.

Aukaverðlaun

• Þröstur átti fyrsta 180 kast mótsins.
• Jónas var fyrstur til að taka út á bullinu.
• Gunnar náði „double-double“ og hlaut verðlaun fyrir það.

Frábær dagur hjá Píludeild Völsungs og mikil stemning allan tímann! Sören Gestsson var líka flottur að vanda.

Við óskum sigurvegurunum til hamingju og þökkum öllum þátttakendum fyrir skemmtilegt mót!

Deildarkeppni Völsungs lauk með skemmtilegu lokakvöldi á föstudagskvöldið, þar sem endanleg úrslit vetrarins réðust.

Brynjúlfur Sigurðsson varð efstur í karlaflokki og Íris Atladóttir í kvennaflokki. Við óskum öllum keppendum innilega til hamingju með góðan árangur og þökkum fyrir skemmtilega keppni og góðan félagsskap í vetur.

Lokastaða í karlaflokki

1. Brynjúlfur Sigurðsson
2. Sævar Örn Guðmundsson
3. Þröstur Þór Sigurðsson

Lokastaða í kvennaflokki

1. Íris Atladóttir
2. Þórunn Anna Magnúsdóttir
3. Helga Björg Pálmadóttir

Píludeild Völsungs þakkar öllum sem tóku þátt í deildarkeppninni í vetur.

Þeir félagar Bóban Jovic og Gummi Lilla mættust í A-úrslitum á „Money in, money out“ móti í júní 2025. Úrslitaleikurinn var magnaður og spennandi, en Bóban hafði að lokum betur, 3–2.

Bóban var með 59 í meðalskor og Gummi Lilla með 57. Jafn og skemmtilegur leikur hjá þeim félögum!

Við óskum Bóban til hamingju með sigurinn og báðum keppendum með góðan árangur.

Píludeild Völsungs átti tvo flotta fulltrúa í Flórídana sunnudaginn 9. nóvember 2025: Snorra Gunnlaugsson og Sævar Örn Guðmundsson.

Þeir hófu leik klukkan 10:30 og hvatti deildin félaga og stuðningsmenn til að fylgjast með þeim og styðja þá í keppninni.

Það er ánægjulegt að sjá félaga úr Píludeild Völsungs taka þátt í mótum og keppa undir merkjum deildarinnar. Áfram Píludeild Völsungs!

Frábærar myndir frá SjallyPally 2026, teknar á vegum píludeildar Þórs. Mótið var magnað og allt til fyrirmyndar hjá Þór.

Við þökkum píludeild Þórs fyrir frábært mót og flottar myndir sem fanga stemninguna.

Myndir: Á vegum píludeildar Þórs.